舊情人再合作 袁詠儀同青雲居然冇偈傾?

2019年02月09日 12:00
東網電視
更多新聞短片
佢哋真係合作咗好多戲!

在英皇電影《廉政風雲 煙幕》,客串演出「海關關長」鍾嘉玲的袁詠儀(靚靚),貴為影后級的她,能夠吸引到她肯客串,當中不止按其意願要角色好玩,最重要是與導演麥兆輝有「親戚」關係,「有親」自然好辦事,靚靚更自揭最大原因,是有默契十足的劉青雲合演,她才心動接拍。

似報告新聞

靚靚表示:「自細我同麥兆輝住埋同一個警察宿舍,不過唔同座數,我爹哋同佢爹哋都係當差,我爹哋叫佢媽咪做表姐(編按:沒有血緣關係,只是兩人暱稱。)由於麥家有四個仔,佢媽咪好恨女,我細個又好可愛得意,所以自細就認咗麥媽媽做契媽,細細個已萬千寵愛,契媽好錫我,不過佢四個仔包括麥兆輝好少同我玩,可能我係女仔的關係。」對於今次客串靚靚很有堅持,如果是可有可無的角色就沒有興趣了,但今次麥導之邀,其實她一度想推,因為對白多似報告新聞,最後麥導解釋此角的對白很有意思,加上打出皇牌,有青雲合演,才令靚靚點頭。

《廉》片開工的第一天,應該說是凌晨,靚靚確有不慣,很久未試過演大夜班的她,擔心不在狀態,靚靚坦言一度因太夜開工,講對白都「𦧲」晒脷:「好彩我專業,又仲後生,頂到!」尤幸她還年輕又是專業才撐得住呢!而與劉青雲的交流,靚靚覺得很「信任」,她說:「啲人成日問,同我最有默契的演員係邊個,我都會答劉青雲,雖然我哋拍咗十部戲,私下講咗十句說話都冇,但一埋位就好明白對方,呢個真係好幸運。(點解唔撩吓青雲講嘢?)做乜要撩人講嘢?人哋鍾意講就講,唔講就唔講,我份人就係咁,啱傾咪傾多兩句,好鍾意講食同玩,初頭同青雲都會講一兩句:『你食咗飯未?』,佢就答:『食咗!』之後都唔會再問佢食乜,佢平時開工都好少講嘢,鍾意靜啲,我哋又唔係有心病,只不過係冇話題啫!」

仔仔都讚型

兩人再遇上,青雲原來對靚靚「見番舊女友」感覺,問靚靚又可有舊男友感覺呢?她說:「我又冇咁深情,青雲令我感覺好親切,好信任佢,知道開工同佢拍呢場戲,唔會有任何問題,好舒服,同佢合作的作品,最深印象唔係《新不了情》,當時同佢仲好生疏,我反而最記得《整蠱王》同《大三元》,因為已經合作過好多次,熟絡咗。不過,我同佢喺街撞過一次,嘩,劉青雲行街喎!我即刻捉我個仔,同呢個哥哥影相,我同個仔講,呢個uncle好有型、好man,埋去影張相啦!我個仔唔係好知,不過我開到聲,咁佢咪聽我話,埋去影張相囉!」

《廉》昨日年初四全日票房高達323萬,而直至今晚10點為止,累計票房已有1,770萬,可喜可賀!