Jessica C.開Youtube教Keep Fit

名模Jessica C.帶同女兒Tessa出席公司春茗團拜，囡囡以國語及廣東話向大家拜年，十分可愛，Jessica話嚟緊會跟囡囡一齊學國語同廣東話，又透露今年大計將會喺Youtube開頻道，講健身旅程，她說：「我有時着露腰衫，見到條腰有啲鬆，覺得好傷心，想練番實啲，下星期開始會搵私人教練教，跟住放上YouTube，同大家分享，一星期三次。（搵老公教？）佢太容易，唔畀壓力，要搵個嚴格啲嘅先有動力，我自已都好緊張，老公都好鼓勵我。」繼又表示老公安志杰已復工，在大陸工作所以情人節不可以一齊過，但之前一家四口去美國放了長假，她說：「上年十二月尾去咗美國旅行同探親，今次係首次一家四口冇工人，照顧兩個小朋友好辛苦，全情冇覺好瞓，但都好開心，半夜要身時，老公都會一齊起，但我哋兩個不停話好攰，好攰。」