Ana R.唔逼囡囡讀書:希望佢健康開心

2019年02月12日 22:00
東網電視
更多新聞短片

名模Ana R.及Rosemary出席公司春茗團拜,Ana帶同一對仔女到場,而Rosemary仔仔亦有到場,但沒有影相。Ana透露新年期間喺屋企搞BBQ,一眾好友拜年,好熱鬧。問到新年願望,她說:「最重要開心,同埋可以瞓個好覺,要照顧小朋友,已好耐冇熟睡超過六個鐘。」在旁Rosemary即和應:「係,瞓好少,但只要見到仔仔就會好開心,好享受呢種攰,係一種特別嘅化學作用,自自然然好興奮,老公都係,不過佢依家去咗美國工幹,情人節會返嚟,佢好掛個仔,我每日都會拍片畀佢睇,今日仔仔識翻身,佢睇到好開心。」

Ana囡囡Maya三歲,問到返學有冇壓力?佢話:「我唔會畀壓力亦唔會逼佢,喺美國五歲先要返學,只希望佢健康開心,佢好鍾意唱歌同跳舞。」而工作方面,佢話都好忙,所以要分配好時間,雖然家庭同工作好難平衡到,但都盡力抽時間,依家好多時都會屋企做嘢。而Rosemary亦十分認同,話家人支持最重要,亦感恩身邊好多好友:「我好多朋友都有小朋友,佢哋成日會傳授照顧小朋友嘅智識畀我,又會畀啲小朋友用品及衫我,對我好好。」