趙頌茹學廚冧囡囡：吸引佢哋食！

藝人趙頌茹出席香港開電視節目《幫人有限公司》到筲箕灣一間燒味店給老人家免費派發100個飯盒，她更臨時炒了大鑊菜來加餸。講到廚藝，她謂因要照顧2個女，都經常下廚，所以廚技都算正常，亦不時自創菜式。問到啱阿女胃口？她笑言：「冇得唔鍾意，屋企食飯係為生存為過活，我由細教育佢哋，食嘢有味道有營養有健康就得嘞。」

可會是「罐頭家長」？她謂：「唔會，我會去行市買餸煮嘅人，但有時阿女要求想食午餐肉都會整畀佢食，但都會花啲心去整，盡量學整一啲出面食嘅嘢，吸引佢哋食。」講到新年都忙於去拜年，她笑言：「當小朋友放假做阿媽嘅係最忙，依家一個讀小三、一個小一，返同一間學校，所以佢哋返學時反而自己就會多番一啲私人時間，可以拍吓片做吓啲網上平台工作。」問到可有攻打四方城發新年財？她笑言：「我嘅工作係啲人行開行埋幫吓人『戥腳』，戥腳都好辛苦㗎，我又唔係好識打，唔好話贏錢，要保住唔輸錢已經夠。」