連環冧啜楊明 莊思明High爆預祝32歲牛一

20190214
東網電視
更多新聞短片
閃光彈嘅嘢,鍾意放就放,正!
藝人莊思明同男友楊明早前傳出今個月會宣布結婚,雖然仲未有聲氣,不過二人連樓都睇埋,真係打風都打唔甩。咁啱聽日(15日)就係莊思明32歲牛一,佢同孖生細妹莊思華尋日(13日)就大搞生日P預祝,莊思明仲High到爆連環錫錫楊明添!
睇番尋晚嘅相同片,莊思明、莊思華同大家姐莊思敏齊人出席,當中仲有唔少得嘅楊明、黃心穎、湯洛雯、高海寧等,一大班人熱熱鬧鬧咁過,現場有晒氣球布置,生日蛋糕都至少3個,仲有隻由粉藍色玫瑰砌成嘅巨型獨角獸,睇見都覺Happy!不過好戲在後頭,莊氏三姊妹齊齊影相準備吹蠟燭時,莊思明已經高興到同孖生家姐咀嘴,之後佢又兩次連咀楊明,見楊明襯好晒黃色衫Match女友,影相時又攬到實一實,果然係貫徹佢哋嘅煙韌作風。