【另類放閃】鄭俊弘何雁詩唱單身者悲歌

2019年02月14日 13:03
東網電視
更多新聞短片
笑爆嘴!

歌手鄭俊弘(Fred)早前被傳上年8月到峇里參加朋友婚禮時與一名女子夜蒲,而且態度親暱,雖然佢作出否認,但仍得女友何雁詩(Stephanie)力撐,兩人恩愛如昔,日前仲去咗夏威夷開心度假添!今日係情人節,何雁詩就把握機會放閃,喺社交網晒相兼留言:「我何雁詩小朋友同鄭俊弘小朋友祝大家2月14顛沛流離 2月14曲折離奇  happy Valentine’s Day!情人節快樂 #很帥很美!」呢張相就係行反傳統風格嘅,絕對唔係啲咩拖手、咀嘴、背影等大路放閃,相中兩人浮誇咁擘大隻眼、嘴歪歪,就連鼻哥窿都清楚見埋!有網民留言讚佢哋係一對可愛嘅金童玉女,仲有人催婚添!

另外,有網民就笑言「2月14顛沛流離」,個音都咁熟嘅?原來最近有網民貼心咁為一眾單身狗送上「情人節賀禮」,將李克勤首飲歌《紅日》惡搞成《2月14顛沛流離》,歌詞貼地搞笑,仲要句句抵死啜核,因此喺網上迅速瘋傳。就連原唱者克勤亦笑爆嘴,佢喺網上發文:「我人在賓陽工作 知道大家咁俾(畀)面 本來真係想唱一唱 反正我也不是甚麼斯文人😂😂😂 但又驚啲仔睇到聽到 你知呢啲嘢小朋友學得最快…😅😅😅 祝大家情人節快樂 單身的就盡快脫單 謝謝大家 #二次創作 #玩下(吓)玩下(吓)無傷大雅。」