路上偶遇　譚詠麟搵「港版羅拉」做女主角

樂壇校長譚詠麟的新歌《移動人》反映都市人忙碌，每刻都處於高速移動的世界，他說：「移動人就好似我一樣咁有活力，曾經試過每日起身唔知自己喺邊，但就算面對排山倒海嘅工作，仍懷着感恩嘅心，積極樂觀咁生活。」校長與「港版羅拉」小朱因為一面之緣，造就了合作契機：「之前我喺街上見過羅拉一次，經過見到佢喺度搬運，好想同佢講聲加油，不過當時交通燈轉，要開車，無奈冇法落車同佢打招呼。」校長覺得新歌好適合形容她，每日都在不同的地方移動，有自我風格，不理會旁人目光，而且享受現時的工作和生活模式，因此MV找來小朱擔任女主角，拍攝她搬運工作的日常。小朱坦言：「我唔覺得自己喺男人堆中工作係另類，反而大家見慣見熟，我變成咗佢哋嘅同類。」

MV尾段校長與小朱在餐廳碰面，兩位「移動人」互相鼓勵和聊天。小朱以「靚仔」稱呼校長，覺得他很有感染力，散布開心氣氛，校長則以「女中豪傑」來形容小朱，我行我素，勇於活出自己的人生。