廿四孝媽咪靜香做柴可夫　貪靚光希狂照鏡

日本萬人迷木村拓哉的寶貝女光希，近日同媽咪工藤靜香飛到紐約時裝周睇騷。日前，她又在Instagram上載新相，於紐約內的皮具品牌店舖內開工。

光希去年5月入行以來工作不斷。剛過了16歲生日的她，本月7日深夜被雜誌《FRIDAY》拍到同媽咪現身東京代官山。當日，星媽靜香做「柴可夫」親自駕車，接載剛收工的愛女。坐在司機位隔離的光希，似乎對臉上的妝容十分滿意，一邊哼歌一邊照鏡，十分貪靚。身為模特兒的她，雖然平日在鏡頭前經常擺出一副cool樣，但私下亦與一般16歲少女無異。

雖然光希揚言以做一流名模為目標，但有圈中人爆料，擁有音樂才華的光希，未出道已為媽咪靜香及女歌手中島美嘉作曲，有望出碟做歌手之外，精通外語的她，亦不排除今後以演員身份攻入荷里活，實行多棲發展。