日日都係情人節！胡曦文排期年底嫁

商界美女胡曦文（前名胡敏珊）日前現身商會新春團拜，身兼活動副主席的她以一身金色旗袍配紅色頸巾，笑言是拜年Look。適逢昨晚是元宵佳節，問到為何沒有伴同行？她即神神秘秘地說：「男友有嚟，但我哋唔同枱坐。」

有愛情滋潤的她透露剛過去的情人節，收到男友送上甜到漏的心思：「佢喺外國訂咗花送畀我，係唔會凋謝，好有心思！仲有一份神秘禮物。（求婚戒指？）唔係！我送咗件衫畀佢，我哋日日都係情人節，拍拖一段時間。（幾時結婚？）年尾或者出年，睇吓排唔排到期……講笑咋！未知。」提到工作，她透露除了代理時尚襪品牌外，又會推護膚品及設計網站。