【勵志人心】神隱李珊珊出關　分享抗病經歷

1996年港姐冠軍李珊珊神隱7年沒有公開露面，她應東華主席王賢誌任內最後一個大型項目《誌友共聚》慈善音樂會現身，珊珊穿上大斗篷由頭包到落尾，見她面容有點浮腫，以神秘嘉賓身份打頭陣出場，介紹東華三院醫療服務外，更分享她個人感受，但她說話時不斷喘氣。

「得番半條人命」

她坦言自己有點緊張，她說：「主席邀請我介紹醫療服務，自己諗咗好多晚點介紹，之後好誇咁寫咗成封信，但上台冇理由對住手機講，就擺低手機，要發自內心咁分享。」一直盛傳她有患腦瘤兼抑鬱症，她坦白說：「呢幾年我喺醫療服務嘅用家，不論公立或私立醫院都成日出入，好多經歷，例如公立醫院服務，試過有次喺屋企發病，打999叫白車送入醫院，再分流去急症，好深感受，因為有個病人嘔到前所未有咁厲害，另一邊又有病人家屬同醫生鼓譟同嗌交，當刻我已經冇咗半條命，好似去咗戰地咁，有啲錢有保險嘅人就會去私立醫院，有次又發病唔想再去戰地，於是去咗私家醫生，點知醫生同我講冇床位，話同我打針，叫我喺輪椅抖30分鐘，睇吓情況會唔會好啲，所以覺得香港真係好需要醫療服務。」

「唔好埋怨，好好堅強」

她笑言就算大家有120歲命，都會生病一次，她說：「呢幾年作為病人都有感受，覺得一定要靠自己，唔使人同情同憐憫，條路一定崎嶇，冇人可以幫病人走出呢條路，不過都一定要有夥伴，親人又好，好朋友、長輩都可以幫你行出一條路，有人陪可以幫到50%，因為精神嘅痛苦比內心更加痛苦，所以叫大家唔好吝嗇幫其他人，有啲病係解決唔到嘅，都希望嗰啲人可以善用時間，唔好埋怨，好好堅強，堅持落去，如果有得揀嘅話，會盡最後努力好好生存，唔想喺過程中苦上加苦。」

最後她多謝東華給她機會分享，並向在場人士鞠躬，全場人士報以支持掌聲，臨落台前她笑說：「唔好意思，怯怯地場，始終係第一個活動。」隨即離場。