拍戲唔擺老婆款　林嘉欣片場聽晒老公話

影后林嘉欣與影帝劉青雲於英皇電影《廉政風雲 煙幕》飾演夫妻，並同樣効力廉政公署，然而現實生活中的嘉欣，另一半袁劍偉亦同樣於娛樂圈工作，執導演筒的他更曾夫妻檔上陣合作新片《死因無可疑》，雖然工作範疇與家中身份有異，但嘉欣坦言雙方合作絕沒問題，更指從來沒有擺出老婆款，於片場會尊重及相信對方。

而夫妻二人平日亦有共同興趣，同樣喜歡電影及戲劇，即使外國影壇盛事奧斯卡頒獎禮，也會一起觀賞及討論：「平時都會一齊討論劇本，大家有共同興趣、目標，會多好多話題，當然開工之前要好清晰，永遠老公係導演，我係演員，呢條線唔可以跨越，我唔可以喺現場覺得自己係老婆就要點樣，一切交由導演做決定。」嘉欣不諱言於片場曾事無大小均告訴老公，直至最近合作《死》片時為求驚喜，會忍口不向對方匯報。

嘉欣唔係購物狂

談到片中為求激嬲老公青雲，於澳洲公幹時喪碌附屬卡，嘉欣否認戲外是購物狂，笑言全是塑造角色的特質所致，透露導演於開拍前，安排了兩位前廉署同事與她及青雲飯聚，以作了解其工作性質及工作以外的習慣：「廉政公署係咁多紀律部隊入面，最高離婚率嘅部門，我問女同事感情生活係點，佢話喺入面咁多年都冇辦法懷孕，直至離開左先懷孕，仲要入職首日要簽番保密同意信，唔可以透露入面做任何案件，所以佢平時興趣都係一個人，畫畫、釣魚、攝影，因為唔方便，所以導演就設定我係個購物狂，呢個行為都係自己一個去，更何況佢又激嬲我，我碌佢張卡係理所當然。」

《廉政》上映至今累積票房已達3千80萬，成績斐然！