傳被大陸女星摑！Baby踏三字頭化怒氣

女星Angelababy（楊穎）今日正式踏入30歲生日，不過近日就有傳佢舊年錄影綜藝節目時，大陸女星鍾楚曦因為玩輸遊戲，心有不忿就摑咗Baby一巴。Baby尋日（27日）接受無綫娛樂台訪問時否認：「其實真係冇呢啲事，我同佢唔算非常close嘅朋友，係正常傾偈嘅朋友。一睇到，點解啲人作到咁？依家網絡環境唔係好好，求其噏啲故事就好多人信，希望大家理智啲。」

另外，老公黃曉明就孖住阿仔「小海綿」獻上生日祝福，上載同囝囝一齊畫畫嘅合照當做生日禮物，不過網友就將Focus放落「小海綿」身上，仲大呼「小海綿」頭髮多到令人羨慕！而Baby喺無綫嘅訪問中，又提到阿仔開始識講嘢，一句句子咁，佢日日都同囝囝FaceTime，又表示唔會母子檔上真人騷節目。