樂壇「老新人」 楊思琦出完寫真再推歌
20190302
東網電視
更多新聞短片
樂壇出現過唔少「老新人」，大家又記得邊幾個？
每年樂壇都會吸引一大班新血加入追夢，其中有唔少「新人」衝破年齡界限，為一嘗做歌手嘅滋味，不惜一切踩過界，同各位歌手切磋歌藝！
康華
演而優則唱嘅康華，以40有7之齡挑戰唱Rap，令一眾樂迷對佢刮目相看。康華憑首隻派台歌《拼火花》踩入樂壇，呢次佢抱住許勝不許敗嘅心態，連好姊妹佘詩曼都舉腳自薦做形象指導，借衫之餘仲自掏腰包幫佢影Poster，認真出錢又出力！而唱片公司都絕冇慳Budget，幫佢借咗部法拉利做MV道具，再配合康華頗為性感演出，即時獲得唔少掌聲支持、鼓勵，搞到佢勁感動話反應好就會再出歌，相信樂迷都會好期待！
楊思琦
由選美入行、去年剛過40歲大關嘅楊思琦再派驚喜！自推出索爆人母寫真後，下一步宣布進軍樂壇做新人，圓夢推出有份自資兼籌備半年嘅處女歌《愛的森林》，仲笑言6歲嘅囡囡已經識背首歌添。而佢喺年廿九舉行簽唱會嗰時仲出盡全力谷線推歌，又帶埋媽咪同囡囡Sweet爆撐場！講到角逐新人獎嘅時候，思琦就謙虛話未知，仲表示唱到歌就已經好開心，唔知佢呢次新嘗試，歌迷又Buy唔Buy呢？
符致逸
音樂才子符致逸（Adrian）於2003年為歌神陳奕迅創作金曲《我們都寂寞》爆紅，其後甘願放棄高薪厚職，為音樂理想打拚。Adrian曾經喺台灣發展，推出首張個人創作專輯《Good Morning，Hard City》，以37歲之齡入圍第26屆金曲獎角逐最佳新人獎，亦係當年入圍金曲新人獎最大年紀嗰個，同年紀最細嘅王彙筑足足相差16歲。之後佢回歸香港重新開始，做一個全職創作歌手。Adrian講過身邊朋友都好好奇佢咁遲入行，但佢嘅解釋係因為冇人要佢嘅歌，或者係要等佢嚟唱。
鄭世豪
現年40歲嘅「細龍生」鄭世豪喺《愛．回家之開心速遞》表現亮眼，原來佢自細就鍾意唱歌，仲參加過唔少歌唱比賽、得獎無數，喺2013年參加《星夢傳奇》更得到第二名。2016年，佢自資推出新專輯，以男新人出道，眼淺嘅佢一拎到「製成品」都忍唔住喊，又自嘲求婚都冇感動到喊出嚟，仲反問自己係咪最老嘅男新人，最終喺十大金曲頒獎典禮同勁歌金曲頒獎典禮斬獲新人獎。
詹瑞文
有「戲劇大師」之稱嘅詹瑞文喺2015年以50歲之齡，踩過界做歌手推出新碟《Heageology》，更笑言出碟出上癮，又幽默表示唔想做最年長嘅新人，所以呼籲各音樂頒獎典禮主辦單位新增「最新奇人獎」，認真爆笑！不過佢就話唔志在攞獎，最想係帶歡樂畀身邊嘅每一個人。
蔣慶華
講到樂壇「老新人」不得不提蔣慶華，齋睇個名未知邊個？佢就係前英皇小花蔣雅文（Mandy）嘅爸爸，6年前佢以55歲之齡毅然投身樂壇，仲對樂壇抱有好大希望，希望藉住自己加入樂壇嚟同香港人講：「只要有熱情同恒心，年紀並唔係問題！呢啲困難只係暫時性，慢慢適應就會好。」仲話有同細佬蔣慶龍（小虎隊成員）交流音樂、分享經驗，又指女兒Mandy都好支持佢，狀態大勇！