【愛上做港女】林嘉欣恨環遊世界

2019年03月06日 13:00
東網電視
更多新聞短片
林嘉欣熱愛旅遊,最想去勻全世界探索!

英皇電影《廉政風雲 煙幕》大收旺場,電影不惜工本拉隊到澳洲拍攝外景一個月,張家輝及林嘉欣在澳洲上演一幕幕精彩好戲,熱愛旅遊的嘉欣更趁機與團隊四出旅遊,如逛美術館、動物園、出海觀鯨、餵海鷗及挑戰行悉尼大橋。

其實嘉欣多年來曾去過的國家多不勝數,歐洲、亞洲、美洲、大洋洲都有她的足迹,堪稱「旅遊達人」!問到最喜愛哪個國家?她即表示相當難揀,因每個地方的食物、景點及文化各有特色,她說:「我對法國係有情意結,始終十幾年前去過進修,睇展覽、食嘢都好好,係近年治安差啲。我亦好欣賞日本傳統工藝,由江戶時代到依家一直傳承,如果冇人欣賞就會失傳。」她又指香港亦有很多地方值得花更多時間遊覽:「米埔自然教育區、西貢海下灣都好值得去,適合帶小朋友去,又有玻璃船可以睇珊瑚,有教育意義,令小朋友知道海洋係多咗好多廢物。我仲會帶小朋友去執垃圾,身為地球一分子,應該了解多啲自己嘅屋企。」

嘉欣表示將來都會繼續到不同地方體驗生活,例如摩洛哥、不丹、冰島、北極、南極:「好多地方想去探索吓,每次我都會盡量了解當地文化,例如去過意大利農村,同當地人一齊住咗個幾星期,食佢哋食開嘅嘢,體驗佢哋生活,呢啲係生活體驗,如果呢啲資訊只係嚟自電腦,會好無癮。(你識好多語言?)好多都係勉強應付到咋!夠膽講就得,每樣係識少少,但透過語文可以知佢哋思考模式,好似日文係冇咩Say No嘅,非洲話就冇『雪』呢個字。」

講到《廉》片有望年底開拍續集,問到是否有心理準備?她笑說:「我未知有冇份喎!哈哈!咁今次演港女性格幾好玩,同我平時畀人印象好唔同,同劉青雲喺屋企鬧交場戲係第一日拍㗎!好彩導演麥兆輝好好,畀晒時間我哋準備。」