抱學習態度合作　蘇永康讚汪明荃好玩得

藝人汪明荃（阿姐）、森美、蘇永康與余德丞晚上為主持的新節目《娛樂大家》錄影。汪明荃以黃色搶鏡套裝亮相，早前自創「汪阿TAG」吸引不少藝人仿效，故服裝左面更有「#汪阿TAG」字樣，玩味十足，她說：「套衫係公司設計，節目都會玩下啲潮嘢，自己每次都想做啲新鮮嘅節目。」

問新節目與之前錄影的《阿姐有乜未見過》節目可有關連？她說：「上次只係一個嘗試，今次節目個形式、內容都唔同。都想公司有多啲綜藝節目，因為一到大騷大家都好似有啲生疏，綜藝節目不嬲都係TVB強項，可以訓練下啲新人，內容亦可以加入唔同元素，如果想吸引多啲嘉賓返嚟都需要有呢啲節目。」

問蘇永康可會與汪明荃碌人情卡邀請嘉賓，他笑說：「一定會，喺阿嬌（鍾欣潼）婚宴上，我都見阿姐（汪明荃）邀請阿嬌上節目。」問可會邀請羅家英擔任嘉賓？汪明荃回答：「佢依家喺橫掂拍緊一套佢做男主角嘅電影，我都未見過佢咁勤力睇劇本，遲啲又要去台灣做嘢，佢好忙。」問與阿姐合作可有壓力？蘇永康笑說：「我每一集都抱住學習嘅態度去做，其實阿姐唔係傳聞中咁拘謹，阿姐好玩得。」