重燃老公浪漫因子！張美妮佗B升呢做女王

藝人張美妮到將軍澳電視城出席「三月星辰」活動，腹大便便的她表示佗B近7個月，預產期為6月頭，並透露老公對於肚內是B女而感到十分開心：「佢自熱戀之後，成10年都冇對我咁好，依家成日都會噓寒問暖。其實今日佢都叫我唔好嚟，因為佢要返工車唔到我，驚落雨跣，但我應承咗嚟，同埋想返公司請產假，所以工人陪我嚟，我都會慢慢行。」講到她還穿厚底鞋，她表示活動後會換鞋。

她亦謂現時少了現身，有時都想出來見大家：「依家日日放假就想出嚟，其實依家啲Job停晒咁滯，但公司仲有3日會出，到5月先會全面停工。」講到她本月2日生日，她表示與老公、父母及妹妹一同慶祝：「今年生日特別唔同，因為佗住個女得一次，所以都有着靚啲影相，老公今次都好識做，平時佢係實際型，唔會送花，但今次就買咗啲花同氣球畀我，我事前完全唔知，去到見到好開心，佢平時唔會做呢啲嘢，我係滔個女啲光，暫時繼續享受做女王先。」她亦謂佗了囡囡後更感覺到媽媽的偉大及辛苦，所以決定每年生日都會與媽媽過。