有《福爾摩》照住　陳松伶黃智賢NG都唔怕

由陳松伶（松松）、黃智賢（Ben）、陳煒、江嘉敏等主演嘅劇集《福爾摩師奶》最近熱播中，由於劇情緊湊，加上查案過程夠緊張，觀眾都話睇得好過癮！不過原來一班演員喺拍攝嘅時候非常輕鬆，就算NG都冇有怕，呢日SeeSeeTVB專頁上載一條短片，留言話：「返工要輕鬆，拍戲都要嬉戲，唔係唔想一take過，而係對白真係好難記㗎！所以演員咪要搵唔同方法去放鬆自己囉～返工好難捱，你又有咩方法放鬆先？」

片段一開始，就見到松松同陳煒喺房度認真拍攝中，點知阿Ben突然拎住啲茶具開房門亂入，擺明係早咗出場，松松都忍唔住話：「呢個人咁嘅？」喺另一場戲中，阿Ben仲對住陳煒反晒白眼兼做鬼臉話：「救到就救吓啦！」真係好抵死！之後到徐榮同松松做對手戲，徐榮問福爾摩斯係咩人，點知松松唔記得對白，於是亂答：「福建人呀嘛。」搞到徐榮笑場，搭住松松膊頭話：「唔好玩啦。」

除咗呢班好戲之人夠玩得之外，一班新演員亦相當爆笑，話說有一幕江嘉敏擁抱陳瀅，余德丞喺後面想攬埋一份，點知畀松松阻止，余德丞即刻擺出滴汗樣，被網民讚演技夠「自然」！有場戲江嘉敏突然坐喺度跳舞，節奏感不知幾好，連佢自己都忍唔住做星級網民留言：「喂！邊個偷拍我跳舞？」最後片尾仲出現松松、江嘉敏同阿Ben齊齊扮鬼臉嘅鏡頭，睇得出佢哋合作得好愉快。

網民有話兒：

王X兒：演員有資本嬉戲，看下啲特約或臨時敢唔敢，特約有啲好勁對白一take過

謝X怡：謝謝分享。松松姐姐好搞笑

Siu FXXg Lai： 好搞笑

BXXNY：拍得好開心！