老婆離奇爆缸標血　陳曉東澄清唔係家暴

歌手陳曉東今晚就會喺紅館開演唱會，呢日喺綵排期間發生咗意外，佢老婆王妤嫻離奇頭部爆缸標血，仲要搞到入醫院治理，而東東喺社交網就晒出揸住包藥嘅相，佢為咗唔好令人誤會，仲留言強調話：「這不是家暴！」

事緣係王妤嫻陪東東綵排時，去廁所撞啱好污糟，咁佢就踎住去，點知起身時個頭就撞咗落上面啲鐵架度，搞到即時爆缸，見佢用張紙巾輕輕印吓都有一撻紅色，睇落都幾嚴重，所以要火速去醫院治理。而東東自己就係因為排完舞好熱成身汗，隔咗一陣都唔記得着番件衫，結果就畀啲冷氣攝親病病哋，因為今晚就要開騷，所以佢都要快手食藥醫好過病，仲話如果情況冇改善，開騷前都要去打支針幫手。