陳瀅突然駕到　陳家樂面紅傻笑避合照

首次參加慈善步行活動的衛詩雅（Michelle）孖陳家樂今早現身，甫受訪爆Seed「投訴」家樂：「我第一次跑好緊張，要跑15km山路都唔容易，跑之前都有上網做定Research，發現要喺孭水桶嘅孭帶攝毛巾，先唔會鎅損自己，但佢跑過冇同我講！」家樂解畫笑指「別有用心」：「我第一年跑蠢咗，着跑步鞋好跣係咁仆、冇着長襪起水泡、又冇攝毛巾鎅損晒胳肋底，唔話你聽係想畀啲歷練你哋，我受過嘅苦都想你哋受。」搞到Michelle好笑又無奈！

講到家樂緋聞女友陳瀅亦會現身參與，他即愕然反問：「係咩？佢嚟咗？早幾日問過佢，佢冇話嘅，只係知佢有朋友跑。」身旁的Michelle彈開爆笑，即被家樂「動武」，她大笑謂：「因為呢我好少回應緋聞，入行以嚟我係冇嘅！就想睇吓咁突然情況下要畀咩反應，好紅呀你塊面！」滿臉通紅的家樂急忙扯開話題話好熱，仲話：「冇呀！唔係緋聞嚟㗎！」Michelle再落井下石笑話：「緋聞係假㗎嘛？唔係真嘅？」又再被家樂用手推開，他裝作大方許下承諾指：「陣間見到同佢影相Say Hi！」

惟當陳瀅抵達現場時，家樂突然煞有介事不願拍照，即使二人迎面相遇最終都只是擦身而過，大合照時亦相隔其他「電燈膽」，家樂臨時縮沙！

係普通朋友

問到可有給陳瀅攝毛巾貼士？他傻笑話冇：「都唔知佢跑！好熱呀！突然間！我同佢係普通朋友，降咗呢嘛我哋。（真係降咗呢？）報紙講嘅，我哋係普通朋友！」仍然保持距離的Michelle繼續笑望家樂，兩度被家樂推開兼「笑罵」：「扮晒嘢行開呀你！走呀！」現場一片笑聲！追問家樂之前不是說沒有同陳瀅聯絡？他坦承從內地回港後有重新聯絡：「有同埋同事一齊食過飯，普通朋友咁食飯。」

陳瀅笑家樂面紅

至於陳瀅聞家樂提起她即面紅一事，她笑話：「係咪佢跑咗一輪先咁紅？（佢話唔知你嚟。）因為本身我有另一個活動，但幾日前取消咗，咁就嚟到，我仲着緊上年嘅衫，今年嗰件都未攞到。（會一齊跑？）如果同一個時間起跑都可以。」