抽水？伸冤？傅嘉莉發文寸呂慧儀造新聞
20190310
東網電視
更多新聞短片
Kelly講明唔理人點睇。
藝人呂慧儀喺電視劇《愛．回家之開心速遞》飾演熊若水一角大受歡迎，尋日（9日）凌晨佢同老公黃文迪突然發聯合聲明宣布離婚，唔少圈中人都大嘆可惜！不過都仲有例外，今日凌晨傅嘉莉（Kelly）就喺IG發咗篇長文，6百幾字嘅內容寸呂慧儀同老公當年借佢造新聞，除咗表明同佢哋唔再喺朋友之外，臨尾仲話做人唔使靠呢啲新聞，只要做好自己就會有人睇到！Kelly言詞都幾激烈完全唔留口，唔通佢唔怕畀人話佢喺呢段時間抽水博見報？
Kelly嘅回應轉頭同大家講，喺呢個時候先同大家回憶吓當年發生乜嘢事先。話說2013年黃文迪喺IG上載咗張喺車內同一位搽咗黑色指甲女子玩十指緊扣嘅相，隔咗冇耐呂慧儀就喺微博都話唔記得自己有搽過黑色指甲，仲問黃文迪係咪擺錯相，唔少網民即刻偵探上身，查吓當時邊個識黃文迪又有黑色指甲，最後矛頭直指傅嘉莉，因為佢同黃文迪曾經喺過同一間模特兒公司工作，加上早幾日出活動佢的確係搽咗黑色指甲，傅嘉莉當時就無端端背上「偷食人夫」之名。
講番Kelly會唔會擔心畀人話佢借機抽水，佢就話：「我要講嘢都喺IG入面寫晒，其他就唔回應。（怕唔怕畀人話你依家出嚟抽水？）我只係講自己想講嘅嘢，呢啲都係我個人感受，其他人點諗控制唔到。」
Kelly IG 全文如下：
幾年前
我和舊模特兒公司
遇到很多不實嘅新聞
也不想多作回應
覺得清者自清，問心無愧
不希望越說越把事情發酵
但這兩天很多不同朋友
發給我呂慧儀同黃文迪的新聞
再次看到這張相片
心裏真的很嬲
我不想因為再顧及其他人嘅感受
要為自己澄清！
當年黃文迪上載的這張相片
相片搽上黑色指甲油
拖着黃文迪的手！
“絕對不是我”
做模特兒嘅時候
同經理人和其他模特兒成班朋友
經常工作後一起吃飯聊天
在他們的婚禮上我也幫忙做姊妹
和呂慧儀同黃文迪
都算是好朋友和同事
因當時我《衝上雲霄2》播出後
出席很多不同的活動
也喜歡用不同嘅造型
會搽唔同嘅指甲油
配襯唔同嘅衫
所以有幾個活動
我穿着黑色裙搽上黑色指甲油
新聞出街前一日
我就已經收到記者要求回應嘅電話
嗰陣時仲係黃文迪上載相片冇幾耐
當時我馬上打電話給經理人
大家第一個反應就是
這隻手不就是呂慧儀的手
這架車不就是他們黑色嘅七人車
為何他們兩夫婦
自己拖手
自己搽指甲油
自己在自己車上
自己影相
自己上載的相片
會聯繫到我身上
為何記者就馬上覺得這隻搽黑色指甲油的手是我
說我就是拖著黃文迪手的人
第二日見報
這單新聞大大被刊登
文中完全沒有替我澄清
只是不斷說我是疑似黑甲女
令我配上“搭上朋友之夫”之衰名
大家可以試試理解我當中嘅感受
大家是朋友
亦是做同一行的
明白做藝人嘅形象是非常重要
為何為了曝光率
為了見報
就可以偽造一張相片
說這長篇大論嘅感言
誣衊自己嘅朋友
做這無恥嘅事情
最後也想說
作為曾經嘅朋友
知道他們分開
也感到可惜
麻煩我的朋友不要再轉發他們的新聞給我
記者也不用再叫我回應他們的新聞
我相信
成功需苦幹
珍惜機會
努力學習
別人會看到的
不用利用朋友
亦不需靠這些
沒意義嘅新聞