曾涉家暴張惠雅　沈瞳伽極力否認：係誤會

樂壇新人沈瞳伽（Esta）今日上電台宣傳新歌《紅娘》，講述化身邱比特去撮合戀人，問到現實中可曾試過撮合他人或被撮合？Esta笑話未曾試過，又表示現時是單身狀態。

問到唱及此新歌會想起曾拍拖9個月舊愛張惠雅（Regen）？他坦承多多少少都會，因為每段感情都是經歷，並主動澄清當年報導他家暴女方的事實：「睇番啲新聞標題都係誤會。（點誤會？）寫話係家暴，但點為之家暴呢？（有冇郁手郁腳？）冇，只係普通情侶平時嗌交咁，之後見到我受傷，其實只係去完旅行唔小心玩水上活動整親，就畀人以為家暴完受傷，其實唔係。（好多人都話係整到受傷喎？）唔係咁樣。」

最終二人不歡而散？Esta表示是和平分手：「冇話唔開心，就似平時情侶嗌完交覺得唔夾分手。（依家仲有聯絡？）冇，亦都冇特登留意佢啲動向，不過做呢行，喺唔同平台都會見到佢啲資料，就略過。（依家做歌手遲啲有機會見面？）見到都唔會尷尬，咁大家都係做嘢，亦都係曾經相識，會Say Hi。」不過Esta就話下個對象不希望是圈內人：「會嘗試搵啲同自己工作圈冇咁近嘅。」