見到周潤發！王浩信戴超咬火柴扮Mark哥

藝人王浩信與張振朗到屯門拍攝劇集《極道怪咖》，講述身為社團大佬的王浩信原來是名追星族，遠遠見到偶像周潤發（發哥）即變狂迷，他更戴上黑超咬住牙籤，模仿發哥在《英雄本色》演的Mark哥，而劇中的發哥由藝人黃潤成串演。

王浩信和張振朗表示本身也是周潤發Fans，王浩信說：「我好鍾意佢，細個都有扮佢，前兩年行山見過，佢讚我《EU超時任務》做得好，我開心到不得了，希望將來有機會真係合作啦！」張振朗亦自認是「發迷」，他說：「我藝訓班畢業戲，都有扮Mark哥，話畀人用三支槍指住我個頭。」此時王浩信糾正他說：「對白好似係兩支或者四支！冇三支喎！」令張振朗哭笑不得！

無聊指數提升

兩人笑言今次合作再提升「無聊指數」，張振朗說：「有幾場戲係開心到做完瞓唔着，夜晚都要講電話！」相當冤氣！王浩信說：「大家唔夠喉，Good Take咗自己都要繼續演多幾次，可能我哋心入面都有份無聊，佢真係無聊得好緊要㗎！大家互相激發！」講到傅嘉莉（Kelly）最近與呂慧儀反目，王浩信表示前日有跟Kelly一同拍戲，對方心情無異，並讚她演出也相當搞笑。