喺無綫歷盡艱巨　盧海鵬嘲未試過「好撈」

藝人盧海鵬及林建明合作主持ViuTV旅遊節目《林盧去追星》，兩人在本月底將出發到韓國首爾拍攝。在記者會上兩人大放笑彈，林建明表示很喜歡看韓劇，池昌旭是她Honey，盧海鵬即搞爛gag：「池昌旭係咪即係揸住支槍郁？」他又表示因爲聽不明韓文，所以沒有睇韓劇，林建明即謂有字幕，盧海鵬就謂：「咁唔使收音啦！」林建明即沒好氣謂睇原裝不同。期間兩人又進行簽約儀式，同意在拍攝過程中遵守四大原則，包括「唔准郁手郁腳」、「唔准藐嘴藐舌、黑口黑面」、「唔准出口傷人、人身攻擊」，以及「有福同享、有難同當、齊齊準時收工」。

問到盧海鵬可擔心拍攝時間長會攰？他坦言：「拍攝可以自己揸主意，叫佢唔好拍咁長，冇所謂。」他又謂今次是首次到韓國及拍旅遊節目：「我喺TVB撈咗咁耐，乜艱巨都拍過，但好撈嘅旅遊節目就未試過，臨老去一次啦，仲可以同相識幾十年嘅阿明一齊去，好高興。」問到到時兩人可會又鬥嘴？他笑言：「做戲先會同佢鬥嘴，平時係佢窒我多。」

林建明就表示是她提議去韓國：「我好早就出道，所以冇咗青春同少女期，過咗幾個世紀後，依家得閒想尋找番當年嘅少女情懷，所以我依家除咗旅行，就係煲劇，做番影迷心態去享受。」她亦謂韓國政府很支持影視界，希望可以有所學習。問到今次是否要見池昌旭？她即少女心大發：「我今次一定要探到佢！知佢雖然已入伍，但喺我哋去嗰幾日，軍方會放佢出嚟幾日拍劇，希望到時我可以撲飛，然後撲上台，哈哈！（上台會做咩？）未知，依家墮入咗少女追星心態，所以好享受。」