離巢即嫁!34歲沈卓盈晒婚紗相宣布婚訊

2019年03月13日 15:45
東網電視
更多新聞短片
恭喜晒!

現年34歲嘅藝人沈卓盈早前離巢無綫,之前話等啱Timing就會結婚,估唔到個Timing咁快就到,佢喺IG上載婚紗照留言:「從不期望驚天動地的愛情,只求細水長流的甜蜜。不知不覺間原來我們的緣份源於十年前的一面,可是種子並沒有在那一刻萌芽。猶幸上帝的安排、緣份的牽引,令我們在四年前的那一天再次重遇,讓彼此加深了解,一起學習,一起成長,再一同走向人生的新一頁,成為相依相伴的伴侶。❤」少婦聯盟最近喜事重重,之前陳凱琳添丁,依家到沈卓盈結婚,真係恭喜晒喇!

沈卓盈同從事內衣生意、拍拖幾年嘅Calvin感情相當美滿,原來佢哋上年年尾秘密去咗巴黎同英國影結婚相,仲喺巴黎鐵塔下留倩影,非常浪漫!沈卓盈準備咗四套來自唔同國家嘅婚紗,當中包括以色列同埋紐約。問到男友幾時求婚,佢話:「喺上年年中,都幾開心、浪漫,但留番少少秘密畀我哋啦!求完婚之後就去影相,我好鍾意法國,佢又鍾意英國所以我哋揀咗呢兩個地方。」問到係咪趕生B?佢話:「我覺得呢一刻以事業為重先,我覺得生B係講緣份。(離開無綫因為結婚?)唔關事,純粹為自己事業,今年所有嘢對我嚟講都係好嘅轉變。(香港擺酒?)未定,有好消息會同大家講。」