孖機械人做司儀　黃穎君嗌好犀利

藝人黃穎君（Burmie）日前同「蜘蛛女」鄭麗莎以及邱芷微（Chelffy）等人出席活動，擔任大使嘅Burmie除咗要宣揚做義工樂趣，仲義務擔任司儀：「第一次同機械人一齊做司儀，依家科技發展真係好厲害，佢係可以同我對答。」

Burmie話當年讀大學時好熱衷咁做義工，因為覺得好有意義，佢話：「大學時期好活躍喺社區服務做義工，好似上門送飯同織冷衫等，嗰時一得閒，暑假就會去做，覺得趁自己有能力時就要去幫助有需要嘅人，雖然只係好小嘅力量，但我已經好開心。」