愛犬多病痛　何國鉦抱實照顧：唔會棄養

時裝設計師何國鉦（Dorian）家有兩頭愛犬，其中飼養了13年的史納莎「婷婷」，因年紀老邁已不良於行，令他十分擔心，但他堅持會用車仔及孭帶帶着婷婷四圍去，他坦言會做一個負責任的狗主。他說：「記得13年前入咗一間寵物店，當時婷婷喺我腳下面好黐我，佢係寵物店主人養，嗰時佢已經十個月大，店主話買狗嘅人只會買BB狗，冇人會要佢，我覺得同佢好有緣，就收養咗佢。」

Dorian坦言其實本身並不特別喜歡史納莎，但覺得婷婷好乖，好聽話又好嗲，直言跟她相處十幾年，當正她是女般看待，他說：「我仲有一隻狗仔叫Hugo，有日Hugo好曳我罰佢時，婷婷好大聲吠，我帶佢返嚟時，佢係唔識吠，嗰次係我第一次聽到佢叫。」可惜去年開始，婷婷因關節病已不能行走，看過中西醫、針灸電療也沒有好轉，Dorian已放棄為愛犬治療：「小便都要人抱住，雖然係辛苦，但我覺得人同寵物都會老，我好朋友名模Ana R.都有兩隻呢種狗，同婷婷一樣後尾都行唔到，其實狗都會年老，唔會因為佢老唔要佢，見佢上落樓梯都唔得，好唔開心，但寵物世界，佢當主人就係佢嘅一切，每日最想我返去同佢玩，所以我都好希望有養寵物嘅朋友，唔好離棄佢哋。」