謝芷倫上海百樂門獻聲:好似發咗歌星夢

2019年03月16日 07:37
東網電視
更多新聞短片
謝芷倫去咗上海百樂門。

藝人謝芷倫(Jan)最近頻頻為活動開金口獻聲,早排去完澳門登台唱歌冇耐,最近又獲邀到上海演出,仲有幸喺著名地標百樂門獻唱,令置身歌舞廳嘅Jan都直言好似發咗一場歌星夢,佢話:「其實我一接到呢項工作嘅時候已經好興奮,一嚟自己未去過上海,二嚟冇諗過可以喺咁富麗堂皇嘅地方表演,真係好難得。當晚我唱咗幾首歌,好似發咗一晚歌星夢咁,聽講以前一代歌后周璇等八大名伶都喺呢度表演過,見到好多到訪名人嘅照片,連笑匠差利卓別靈都嚟過跳舞,對我嚟講可以有機會踏上呢個舞台,真係好感恩同榮幸。」