爆男友浪漫事迹 36歲黃智雯恨拋花球

2019年03月16日 15:44
東網電視
更多新聞短片
Mandy出席荷里活廣場花花世界大派對活動。

藝人黃智雯(Mandy)出席荷里活廣場花花世界大派對活動,即場製作花球又跟粉絲互動。見Mandy整花球時非常熟手,她表示沒有學過,但喜歡看別人整,再從旁偷師,又指記得讀書時第一次拍拖收花,連花謝了也捨不得丟掉,於是將花朵製成乾花及書簽。

男友低調又浪漫

問Mandy可有收過很誇張的花束?她坦言:「收過一大盒玫瑰花,係男友送。今年情人節,男友都有送花,唔係我要求,但佢會做,覺得好sweet。(男友係浪漫之人?)我覺得係,但佢唔會講出聲,佢會做出嚟之後畀個驚喜你,我都幾欣賞,低調得嚟浪漫。」至於Mandy自爆做過最浪漫的事,是拍拖一周年時,她將兩人的相片製作成畫冊:「我仲畫咗啲畫喺入面,我畫畫唔叻,所以收到嘅人會知道我幾落力。」而Mandy在台上整完花球後,揚言想拋花球,問她是否恨嫁?她笑言:「我係鍾意掟嗰吓,杏兒(胡杏兒)結婚時拋嘅花球係我收到,其實唔係我接到,係佢夾硬畀我,不過我覺得都開心,係一種祝福,未必一定係下一個結婚。(有結婚計劃未?)未,不過我成日幻想將來個婚禮係花海。」

過歐洲時間

談及工作,Mandy表示劇集《降魔的2.0》正拍的如火如荼,但因超時關係,預計要拍到五月中,拍畢後會先休息一陣子。由於劇集以夜戲為主,她笑言自己恍如過着歐洲時間,但仍堅持開工前做運動,最近對瑜伽及伸展運動上癮。問到戲中有否打鬥場面?她說:「打戲我比較少,交畀馬國明同C君打,不過壓軸嗰場會有個幾大嘅打鬥場面。」