躁父虐打中成長!張衞健諗過幾時死

2019年03月16日 16:27
東網電視
更多新聞短片
原來張衞健童年好慘…

現年54歲的藝人張衞健經歷過大起大跌,最近他到學校向年輕人分享人生遇過的挫折,提到當年在TVB經歷過痛苦。當時他人工低,冇錢開飯,到公司餐廳食飯都冇錢結帳,惟有扮忘記帶銀包,但餐廳老闆很好人,次次都放過他。如是者三、四次之後,老闆勸他別再演戲,因為知道他連開飯錢都沒有,但睇得出他有前途,並相信他將來會還錢。張衞健表示努力了8年後終於做到男主角,然後把錢還給老闆,直到多年後返回TVB想探老闆,驚覺對方已過身,所以提醒大家愛要及時。他亦謂相信人生仍會有大打擊,但柳暗花明又一村,故奉勸大家:「遇到任何事嘅時候,我哋反應可以慢少少,唔使太快憤怒、悲傷、絕望、放棄。」

被打幾乎窒息

他又提到人生第一個挫折是童年時在躁狂爸爸的虐打中成長,做船員的爸爸一年只有3個月時間在港,但他一回港,全家都會被他打。他記得有次騎爸爸膊馬行街,當時自己向一架好靚的車吹口哨,但回到家就被爸爸暴打:「佢二話不說將我凌空拋落床,撳住我嚟打,撳到我抖唔到氣,幾乎窒息!佢都會將細佬打到皮開肉綻,我記得當年7、8歲時諗,幾時會畀佢打死呢?」幸好最後他用倒數心情渡過難關:「佢每年都只係返嚟3個月,依家已經過咗兩個月,剩番一個月,同埋佢唔係日日發作,唔係鑊鑊都係我中招,於是當爸爸返嚟時,我每過一日就會開心啲。」他透露14歲時父母離婚,坦言當時開心多過唔開心。