阿媽係女巫！張敬軒飲神湯補腰做好男人

歌手張敬軒舉行新曲集郵日活動，現場與粉絲互動，又玩造型又跳舞，其間軒仔在兩粉絲眉上「點睛」，軒仔笑指要在男粉絲的「行運鼻」上加幾筆，他忍不住笑：「本來想加深佢鼻形，點知畫完出嚟變『男人的驕傲』。」

講有味笑話

除了整蠱粉絲，軒仔亦自娛大家，將「假肌肉」放上身，教兩名男粉絲擺出大隻佬Chok甫騷肌相當搞笑，軒仔又扭腰做Warm up，台下傳來笑聲，他說：「男人要腰好，點兜好，要成日幫攞重嘢，你哋笑果啲好心邪。」

半裸會淆底

軒仔接受訪問，提到他之前誇下海口說新歌《YOU》MV若點擊達200萬將會半裸上身跳舞，他說：「開始有啲淆底，因未練好個Body，費事到時一堆堆救生圈出哂黎，畀啲時間我，教練話加操1星期4堂，有日操到差啲休克咁滯， 不過有時係要還嘅，之前咁放縱係咁食消夜。夏天啦，應見得人喇，所以我未驚過！」

軒仔稱母親日前來港探望，留港2日煲了不少補湯給他：「我有哮喘，佢成日煲海馬湯畀我補腰，又試過煲紫河車、蠍子嗰啲。我成日諗，如果我阿媽係哈利波特嘅年代，佢應該係女巫，因為佢成日好多偏方煲畀我飲。」