帶女返歸勁大劑!阿澤擘大口得句點會答你吖

2019年03月16日 20:41
東網電視
更多新聞短片
平時最叻講嘢嘅阿澤畀夜會長髮女單嘢搞到口啞啞!

人人都知杜汶澤把口𠺘過油,今次佢趁老婆田蕊妮唔喺香港,夜會長髮女呢單嘢,就畀呢灘油跣到仆喺度。梗係啦!呢次斷到正一正,愛妻號個金漆招牌好易被拆爛,唔好好應對記者問題,唔止公關災難,隨時演變成人生災難呀!

我哋就將時間校番去凌晨時分,阿澤畀影到佢同長髮女返歸個Moment,長髮女係圈外人見閃光燈係咁射,驚到立即耷低頭係人之常情,但阿澤見到咁嘅情況仲唔心諗大鑊咩,擺明無師顯見師,心急口快快爆粗:「你咪X耷低頭!」長髮女就咁慘變出氣袋。

拍過電影《大丈夫》,阿澤都知「老婆唔喺度約女出街被斷正」嘅危機處理,即Call埋班Friend上去佢屋企Gathering,都說最危險嘅地方就最安全,成班Friend喺屋企開P喎,就算長髮女喺張相入面又如何,老婆見到都安心啲。

經過一晚「痛定思痛」,「老江湖」阿澤似乎都冇諗過去做Gym都會畀記者突擊佢,以下嘅真實對話就見到平時死都拗番生嘅佢,變咗啞子食黃蓮啦!

記:尋晚個位女士邊個嚟㗎?

澤:我點會答你吖!

記:嗰位女士阿田識唔識㗎?

澤:我點會答你吖!

記:阿田知唔知你帶女士返屋企呀?

澤:我點會答你吖!

三個問題,同一答法,平時嗰個阿澤去咗邊?佢都心知呢鋪瀨嘢,應該係一邊舉鐵一邊度個Storyboard,出嚟再見記者都好交代啲。出到嚟記者再問佢尋晚個女仔住康樂園附近㗎?佢終於勾畫出個完整故事嚟。

「佢馬來西亞人嚟!」

「佢幫我化妝嘅!」

「嗰時拍《走佬去馬拉》嘛ViuTV,佢嚟旅行嘛,咪一齊食飯,同我、教練同佢老婆......因為嗰陣時喺馬拉一齊拍走佬.....好熟嘅!」

「分兩部車,我哋入咗嚟先,跟住去到閘口,見到你哋係咁閃,佢又唔係做呢行,好驚,成個縮埋,你試吓突然閃佢都縮埋㗎!」

「跟住冇呀,咪成班喺我屋企傾偈飲嘢,飲到兩、三點....(臨上車前補多飛)呢啲最緊要老婆知,老婆唔知大鑊!」

係囉!老婆唔知好大鑊,早咁答咪冇事囉!不過呢個「完整答案」,阿田係咪真係收貨呀?