主動邀約冇反應！祖兒寸Dear Jane少近女色

樂隊Dear Jane舉行首個紅館演唱會，請來天后容祖兒任嘉賓，唱出Dear Jane為祖兒寫的作品《心之科學》，祖兒在台中央升上來時，全場觀眾歡呼，祖兒表示在後台都為他們尖叫，腎上腺急升爆炸，講到做嘉賓一事：「記得十月嘅時候，我個澳門騷第一次唱《心之科學》就請咗你哋做嘉賓，當日喺Band房你哋同我講，你哋開紅館騷，但跟住就Dead Air咗！」

主音Tim補充說：「祖兒問完我哋幾時開騷，佢就話要Mark期，佢就係咁嘞。」但祖兒笑言：「最大問題喺我角度睇你哋一啲興奮都冇囉，作為一個女仔咁主動，但見到四條麻甩仔呆咗，咁係咩玩法呢。」成員Howie解釋是怕醜之故。祖兒笑謂：「你哋成為Band仔都咁含蓄真係第一次見！係咪你哋少接觸女色呀。」Howie笑謂：「係呀，我哋自己幾個男仔玩咋。」祖兒笑問阿Tim：「但你女都生埋喎！」笑爆全場。祖兒最後叫四子補回當日欠她說的一句話，阿Tim即謂：「多謝、多謝！」祖兒才滿意說：「舒服晒嘞。」祖兒又認真說是來報恩，因《心之科學》去年推出獲得好成績，要多謝他們。之後，Dear Jane要祖兒多唱一首先準離開，就合唱了祖兒的歌曲《牆紙》。