公開戀情護曾樂彤　游學修爆粗插網民

藝人游學修同歌手曾樂彤早前被拍下齊齊返男方屋企而爆出戀情，不過當時人用「朋友」嚟稱呼對方，明顯想低調處理戀情。凌晨時段，游學修為咗保護被網民攻擊嘅曾樂彤，終於公開關係並爆粗向網民開火！

甫練歌片加hashtag出事

事緣曾樂彤日前出席一個頒獎禮演出，畀一班網民質疑佢咪嘴，仲叫佢道歉同檢討，曾樂彤就喺社交網嘅限時動態上載自己苦練歌喉嘅片，留言嗌網民鑑定唱功，不過佢就加上一個hashtag「#micnlm」，令網友聯想到係粗口諧音，因而更加群起追擊曾樂彤。

游學修出面力撐

身為男友嘅游學修有見及此，決定喺社交網用500字講番眼見嘅事實，為咗表演，女友事前努力練習又唱又跳，結果換嚟無數惡意批評，游學修強調女友絕對冇咪嘴，雖然明白無論佢點講，一部分網民係唔會理會繼續攻擊，佢自爆曾經勸過女友：「嬲咪XX佢哋囉，理直氣壯怕咩！」曾樂彤當然冇咁做到，所以游學修要站出來陪住喺女友身邊一齊打呢場仗。而游學修亦有回應網民叫曾樂彤道歉同埋檢討嘅指控，佢話女友只會為喺娛樂圈保持真性情而道歉，只會檢討如何贏得更多觀眾嘅歡心，最後佢仲引用《新喜劇之王》一句對白「她很努力，她會成功的」嚟鼓勵女友！唔少網民都大讚游學修有擔當Man到爆，仲話好羨慕曾樂彤，有個肯企出嚟幫女友遮風擋雨嘅男友！

直認留言未必係最恰當

曾樂彤回應東網指：「其實大家嘅留言我都有睇。對於當晚嘅表演我係有盡力去準備，盡力去做好，而且大會並不鼓勵歌手不作現場演唱。作為一個公眾人物，當刻喺自己嘅平台表達咗自己嘅情緒可能未必係最恰當。接下嚟我會繼續做好本分、虛心學習，無論好與壞嘅意見我都會接納，同埋多謝所有支持同信任我嘅人。」