冇問男友意見?蔡卓妍自爆連打10日針雪卵

2019年03月17日 12:14
東網電視
更多新聞短片
辛苦晒!

藝人蔡卓妍(Sa)和周勵淇(Niki)出席「洪聖爺傳統文化節」活動,並進行放水燈儀式。講到有傳阿Sa今年結婚?她即言暫時未有打算。身邊好友個個已做人妻,她不心急?她謂:「我不嬲唔急,係你哋成日催我,真係吹脹!」是否要贏得影后獎項才結婚?她謂:「攞唔攞獎同結唔結婚都唔係我可以控制。(結婚點會控制唔到?)結婚唔係咁兒戲,要慎重考慮,兩個人相處要好充足,因大家婚後係過另一個生活。」阿Sa續笑言當日Niki結婚都有問她意見:「我處理人哋問題係好理智!」Niki笑道:「所以我直接跳過催婚呢Part去嫁人,但依家就被人催生B,都好大壓力。」

準備「雪卵」

講到生B時,阿Sa就自爆準備「雪卵」,Niki聽到即提議一齊雪,但阿Sa就謂:「要食咗保健品先,我食咗幾個月喇,之後要每日打針要連續10日。(幾時要打針?)因為係啲賀爾蒙針。(打咗個人變腫?)係呀,你知我係肥底㗎喇,所以我要有時間先可以做,嗰排要閉關唔見人,如果到時見到唔好唔話我肥呀!」男友石恆聰有冇意見?Sa說:「我第一個要問嘅人係我阿媽,我阿媽話ok嘅,所以之後任何人講乜嘢我都係會去做,因為我係嚟自我阿媽。」

阿Sa稱雪卵在香港進行:「不過諗起打針就好驚,因為要自己打落個肚度,所以可能到時都係每日去搵醫生打針。而選香港係因為香港一定要婚後先可以用粒卵子,所以對小朋友嚟講,有一個完整家庭好啲。」阿Sa再問身旁Niki是否有興趣?Niki即謂:「咁我試咗自然有先,咁我有個人(老公)喺到唔好嘥嘛!(你家姐被影到去龍武廟求女?)佢唔使啦有兩個,係都我先。」