演劇出歌雙管齊下！杜之克望谷林峯奪獎

藝人林峯回歸無綫，並稱今次回娘家全因無綫副總經理（節目及製作）杜之克邀請，問是否全靠他功勞？杜之克即客氣表示：「唔係唔係，靠隻古仔、靠個Project，其實關鍵係大家都覺得阿峯係時候做呢件事，我覺得係形勢，應該積極去試吓，我哋就搵咗個Project好啱佢，啲同事都花咗好多心機做一個好出色嘅人物，同佢傾咗一次古仔，佢都覺得係好好嘅時機去做。（個Project可唔可以透露多啲？）其實我可以透露聽日留心Filmark啦！（即係為佢度身訂造？）有好多嘢都要度身訂造。」

助事業再創高峰

講到歌曲方面，星夢娛樂行政總裁何哲圖表示：「其實上年已經同阿峯嘅經理人傾開，覺得阿峯把聲好適合演繹我哋嘅電視劇，因為我哋啲主題曲滲透力好強，可以去到全亞洲，而阿峯歌曲演繹得非常之好，對劇嘅發揮係一流，佢返嚟TVB可以合作，加埋杜生嘅電視劇，相信對阿峯係雙得益彰，可以幫到阿峯嘅事業再創高峰。」

合理價回巢

有劇和有歌雙管齊下，問是否可為阿峯奪「視帝」及「最受歡迎男歌星」獎？兩人笑言：「希望可以做到。」對於再簽林峯回歸，問酬勞可是天價？杜之克說：「我覺得係合理價，唔係天價。（開心價？）我就好開心喇，阿峯你哋要問佢。」問到是否只簽了一個Project？杜之克就表示：「係逐個逐個傾嘅。」

而歌曲方面，何哲圖稱除今次Project入面歌外，歌曲都會長期合作。當講到林峯成為星夢旗下歌手，是否會坐上「星夢一哥」之位時，何哲圖笑言：「冇嘅，公司男男女女好少咁分，個個都係好開心嘅。」