宅女指數爆燈！菊梓喬恨搵男伴外遊

歌手菊梓喬（Hana）到馬鞍山出席商場活動，即場獻唱歌曲及分享到日本旅遊的憧憬，她表示向來很喜歡日本文化，但只去過日本兩次，頭一次十多歲時跟父母同行，但她與妹妹病足全程，因此沒有甚麼難忘回憶，直到前幾年跟友人到日本郊區浸溫泉及歎懷石料理，之後更獨自一人留低繼續玩。問到會否覺得寂寞？她笑說：「我都好宅，一個人去食飯、睇戲、唱K、旅行，我全部做過晒。（想下次有個男伴一齊去玩？）都好喎！可以幫手拎嘢同幫我影相。」Hana在日文的意思是花，她亦表示自己最愛看花，但尚未親眼看過櫻花：「死之前一定要睇一次！今年去唔到日本睇，睇吓出年有冇機會。（今年都應該冇假放？）我鍾意工作，但睇吓出埠做嘢嘅時候有冇得留多一兩日玩囉！」

講到林峯重返娘家無綫，音樂上則與星夢合作，身為「星夢一姐」的Hana表示開心，希望有機會可與對方合唱：「以前都有留意佢嘅劇集，好鍾意佢《溏心風暴》、《使徒行者》，配埋啲歌好動人，我都成日會唱《愛不疚》。（一直好欣賞佢？） 佢畀人好溫暖嘅感覺，係太陽系男友！」