唱到㷫除衫!謝霆鋒露兩點弗過20歲嗰陣

2019年03月17日 20:02
東網電視
更多新聞短片
霆鋒好有型呀!

歌手謝霆鋒以壓軸嘉賓身份現身亞博戶外騷,戴黑超、着黑衫襯牛仔褲的霆鋒於大約傍晚6時現身,全場即陷入瘋狂狀態,不斷尖叫喪嗌,現場氣氛高漲!期間霆鋒被氣氛感染,High爆落台分別走到台前三面同Fans作近距離接觸,興起時更脫掉剩下的黑色衫,露兩點、大晒腹肌派福利,身形還弗過20歲唱《活著Viva》之時。他繼而將衫拋向人群,更抵死笑說:「件衫成7個星期冇洗!」他又赤裸上身、孭起結他大晒功架。霆鋒爸爸謝賢(四哥)為求以一個最佳位置睇仔仔演出,不惜走入人群堆,還邊行邊同Fans握手、自拍,大受歡迎!

霆鋒唱經典歌Medley時,台下Fans自動波大合唱,氹到霆鋒不時向台下揮手大笑!唱完《壞習慣》後,他先除下黑色外套,然後說:「Hello Hong Kong!我愛香港!好耐冇見!(《壞》)呢首歌都有成十幾、廿年前,當時我16歲,係1996年嘅一首歌,依家都2019年啦!」續興奮謂見到台下有好多熟悉的面孔:「你哋可能都帶住仔女、老公、老婆,甚至個孫嚟,一直都不離不棄,多謝支持我嘅人!今日對我嚟講係好有意義,希望你哋玩得開心!」令全場尖叫聲不斷!

來到戶外騷的最後部分,霆鋒與由網上召集的百人大樂隊一齊演繹兩首經典金曲《不要說謊》及《活著Viva》,進一步將氣氛推至最高點!負責打鼓的霆鋒帶領住百人大樂隊演奏,並說:「呢個(百人大樂隊)係一個好黐線嘅想法,講出嚟就易,但最後大家都做到!淨係齋搭每個人對耳機嘅線都夠晒黐線!」最後霆鋒臨落台前飛吻兼鞠躬,順利完成約半小時的演出,亦為戶外騷畫上完美句號。