買磚頭最實際!黃宗澤擲千萬馬國連掃4盤

2019年03月20日 00:01
東網電視
更多新聞短片
黃宗澤飛去馬來西亞「尋寶」,睇準新盤有升值潛力。

藝人黃宗澤(Bosco)離開無綫後,於內地及香港都發展相當不俗,自從簽約成為邵氏兄弟公司經理人合約藝人,更拍攝多部電影及劇集,認真賺到笑。除了擁有自己的娛樂公司及餐廳外,懂得投資的他多年前已於香港買樓,近年更轉戰馬來西亞等地。與陳嘉桓傳緋聞的他,之前被指雙雙到馬來西亞旅行,其實他除了到那兒開會,原來還睇新樓盤,繼續物色「新竇」。

撐住拐杖都要睇樓

Bosco已揼本過千萬在馬來西亞擁有四層樓,全部更是新樓盤,他受訪時說:「我成日都過去㗎!嗰度好多新樓盤,耐唔耐都會飛過去睇!我不嬲好鍾意買樓,喺嗰度都已經有幾層。(諗住Keep住買幾多層?)當然愈來愈好,哈哈!睇啱嘅唔怕再入。」問到在彼邦置業有何要求?他說:「地段好、發展商好同有信譽,佢啲樓好多包晒裝修、傢俬,好正㗎!買咗租畀人,等升值都開心啦!」早前拍戲傷腳要做手術的他,至今仍要撐着拐杖行路,笑言「跛」住都要去買樓:「撐拐杖都要睇樓,都要食飯㗎!」

今次心水單位,只看裝修已經很吸引,Bosco都讚口不絕:「依家馬來西亞啲樓個價唔係十分高,有升值空間,我都係向任達華哥哥學習,個個地方都買吓!」向來孝順的他,樓宇除了自住外,還會給黃媽媽旅遊時入住。其實他在港亦有買「磚頭」投資,問到開餐廳的他有否打算買舖時,他說:「香港啲舖太貴喇!我有買工廈,租畀人又有,自己做Office又有,我又有咁鬼多衫,用嚟擺衫都要。」