相愛10年仍轟烈　孫耀威驚陳美詩出軌

歌手孫耀威（Eric）出席微電影頒獎典禮活動，並憑《圓》奪得「最佳微電影男主角（專業組）」金獎，他表示《圓》是將自己的歌曲拍成微電影：「其實愛係好似一個圓圈，有開始冇終點，自己年輕時就追求轟轟烈烈嘅愛情，但當年紀大就追求細水長流嘅愛情，無論一齊幾耐都要恩愛如初。」

Eric透露過幾天就是和太太陳美詩的拍拖10周年，問到夫妻生活轟不轟烈？他笑言：「我哋都算仲係轟烈，之前農曆新年去咗一個講咗好耐嘅歐遊旅行，都算係補度蜜月，去咗兩個星期，好驚訝我哋已經10年，的確愛情要畀大家新鮮感，我哋都仲喺圓圈入面跑緊嘅，希望唔會出軌啦。（你唔會出軌啩？）唔會，我已經係絕緣體嚟，係驚佢啫！哈哈！」

嘗試浪漫造人

問歐洲之旅可有成功造人？他謂：「唔會啦，但都有講呢個話題，係有講多咗嘅。（咁講多冇用，要多做先得？）因為之前真係好忙，好多時我哋又遇正佢唔方便嘅日子（生理周期），所以希望嚟緊日子多啲時間見。」問太太可會考慮雪卵？他表示：「我覺得咁唔浪漫，我都係希望可以浪漫啲進行。」