追B要定驚！鄭嘉穎湊「皇上」搞到抑鬱

鄭嘉穎太太陳凱琳上月誕下「小嘉穎」鄭承悅，早前，他接受訪問，大談初為人父的苦與樂，並以「皇上」來稱呼兒子：「佢啱啱出世一個月，現階段屋企好需要我，得太太真係搞唔掂，嗰個皇上好扭計，你服侍佢要快，慢就喊到七彩，我終於明白點解啲人話女人有產後抑鬱，我都想抑鬱，真係搞到你癲，好難搞，拍戲簡單一百倍。（會唔會再生？）你畀我過完呢關先，我都要定一定驚，依家出嚟都會擔心同心掛掛，我嘅整個人生、心態同思維都唔同，小朋友係第一位，自己放到好後。」

暫時不離港拍戲

要「定驚」的他拍戲反而不擔心受傷：「冇得驚，上得台唔可以怯，怯親就輸。（唔想離港工作？）呢個階段係，如果三個月唔喺香港真係唔得，多多錢都賺唔到。」人生階段有所改變，工作模式亦隨之轉變：「依家工作上會有選擇性，唔會好似以前咁多，以前唔可以揀，因為要搵食、要生計。」

跑戲十足馬拉松

近年主攻影壇的鄭嘉穎有份演出的電影《P風暴》，延續他在風暴系列的角色，飾演廉署的調查主任，戲中有不少甚考體能的場口，除了要在直升機上跟林峯對打，還經常為保護證人而逃跑，他表示最難忘的一幕是要跑勻整個大球場，跑足全日：「由大球場外圍、辦公室、通道都跑過，未試過跑咁耐，真係跑馬拉松咁。」他指今次是跟林峯相隔15年後再度合作，是個不錯回憶：「我係第一次同佢拍打戲，大家嘅身手仲喺度。（咁耐冇合作，仲有冇默契？）向來佢做佢，我做我，所以個默契冇改變。」然而最遺憾是嘉穎跟林家棟雖在同一套電影演出，但就完全沒有對手戲，他冀下次有合作機會。

對於自己在片中的表現，嘉穎謙稱不敢說，但有自己的場口都會盡力：「今套戲係咪好多發揮，唔算，要慢慢build up，如果你要我孭起一套電影，我都驚，電影唔同電視劇，一套兩套就好難再有，電視劇嘅機會比較多，只要你簽長約。（覺得喺電影上遲起步？）每個人嘅路唔同，你話早十年，我又未ready，起碼我乜都試過我冇憾，最後結果唔知，但試過，亦對自己有個交代。（依家隨時準備好？）拍電視最大好處係畀你不斷訓練，我都訓練咗16年，都應該差唔多。（想挑戰難度？）依家等緊。（最想挑戰咩角色？）最緊要有戲做。我未做過嘅角色都想做，傻佬又得，我唔介意演反派，依家咁嘅年紀都冇晒啲包袱，愈有挑戰性愈開心，但演員嘅無奈就係要等待。（挑選劇本時要考慮太太同小朋友？）職業還職業，任何角色都要handle到。（親熱戲呢？）因為太太係演員，佢都明白呢啲係工作一部分，我唔知將來會遇到幾大尺度，到時再量商。」

化妝﹕Henry Li

髮型﹕Nicki Ting

外套﹕McQ@ITHK，褲﹕FIVE_CM@ITHK

場地﹕Studio King影樓王

----------------------------

東網巨星開咗ig喇，大家快啲follow啦！

https://bit.ly/2JjSVcr