【被指食軟飯】黎諾懿直認靠老婆發達

藝人黎諾懿四年前娶了富家女李潔瑩，榮升「五億駙馬」，更被指女尊男卑，負面新聞一面倒，他揚言真的「靠老婆」，皆因篤信風水玄學的他，讚太太旺夫，婚後事業順風順水，果然靠老婆會發達！

黎諾懿與前港姐李潔瑩結婚後，一直有不少難以入耳的說話，如女尊男卑、食軟飯等，他都豁然面對，坦言夫妻相處之道就是對老婆千依百順，不逆她意。

努力工作闢謠

問到會否變得沒有話事權？他說：「係㗎，冇所謂，如果夫妻有拗撬，最終都係老公氹番老婆，追佢返嚟應該錫佢多啲，我老婆好多嘢都處理到，尤其依家小朋友讀書問題，我又冇咩讀過書，佢又讀咁多書，當然畀晒佢搞，我只負責接送，有需要我會出場，但我只有一個要求，唔好有咁多功課，我希望仔仔有個快樂童年。（有冇試過同老婆嗌交？）暫時零嗌交，我好識處理夫妻間嘅關係，就係忍讓，將大事化小，小事化無。」

面對負面評價，他表示會用時間去證明：「我唔會解釋咁多，免得愈描愈黑，家人知我做緊咩就夠，我會好畀心機以行動話畀大家聽我做緊咩嘢，當然我身家短期內冇可能超過我外父，但可以話老婆同仔仔我照顧得好好，佢哋可以過得好安穩，唔使憂柴憂米。」

婆媳好感情

黎諾懿憑《BB來了》新手爸爸角色，吸納大批師奶粉絲，人氣爆紅，對此他說：「應該咁講，我自從同太太結婚開始，發展都唔錯。（佢旺夫？）我篤信風水玄學，所以屋企都會擺啲嘢，我太太就會話『你唔使擺，你擺我喺度就得』。」問到不少家庭會有婆媳糾紛，他有否這問題？他說：「好彩我媽咪係好聰明嘅老人家，可能我哋三兄弟，我最遲有小朋友，分散晒媽咪嘅注意力，而且媽咪比較開明，佢哋咁耐都冇摩擦，我同太太同媽咪每年都會去一次旅行，佢哋成日行街，感情仲好過同我。」