想40歲前做呢件事！岑潔儀心痛老公畀人打
20190324
東網電視
更多新聞短片
岑潔儀好開心細仔兩個月就戒咗夜奶。
去年11月誕下細仔的岑潔儀（Zoey），今日產後首度出席活動，四肢依舊纖幼的她卻大呻身邊朋友和媒體都對自己的身形太苛刻：「要我生完即刻變番未生之前咁，依家生完3、4個月，都努力修緊身，最近仲去咗紮肚，但都仍然係餵緊人奶，所以都要食得健康。（依家減咗幾多磅？）10磅，未生之前肥得太誇張，成70kg，依家50幾kg。」
問到老公可有「投訴」她太肥？Zoey笑說老公話要以身作則，故最近狂做運動：「佢依家打Boxing，操到有6舊腹肌，所以企喺佢隔籬好肥！（老公打Boxing咪有可能會受傷？）都會心痛，上次陪佢去Training見到佢畀人打好心痛，不過佢話想40歲之後做樣難忘嘢，所以都會支持佢，就好似我都想40歲之前做件事。（咩事？）想去玩Skydiving，以前我好大膽，過山車咩都敢玩，但依家就好驚有生命危險，但人一世物一世，睇吓遲啲去澳洲、新西蘭玩。」
一講起細仔陳顥昇，Zoey即冧讚細仔好錫自己：「佢兩個月就戒咗夜奶，好開心！大仔2歲先戒到，好大轉變，通常都係一個曳一個乖，細仔個樣似我啲。（你會偏心？）又唔係，大仔見我冇化妝會讚我靚。」幾時追番個女？Zoey恨到出面話好想：「依家一屋都係男人，就連隻狗都係男仔，不過都想休息吓先，湊兩個小朋友都好攰。」
同場還有可嵐、安俊豪等，而剛巧司儀嚴崇天日前生日，大會特意準備蛋糕與他慶祝。
----------------------------
東網巨星開咗ig喇，大家快啲follow啦！