阮民安再添丁 細仔似足爸爸

2019年03月25日 21:03
東網電視
更多新聞短片
恭喜晒!

E-kids成員阮民安(Tommy)與老婆張倚雯(Eva)的第二胎終於出世,原育有兩歲兒子阮治童,第二胎都是公子,BB較預產期早了六天順產出世,重3.18KG,母子平安,完成三年抱兩!

Eva第一胎生產時,經歷廿多小時陣痛,但今胎很快便順產出世,現時餵餔人奶,Tommy說:「聽人講第二胎會早嘅,今次陪住太太生,由入產房開始陪,因為上次冇陪佢,佢生時我才出現,因我本身怕血,臨生時才陪佢。但今次就一路陪住佢,睇住成個過程,佢好辛苦,一度想放棄,要吸笑氣和想打止痛針,我喺側邊唱啲無聊歌氹佢開心,轉移視線。有個護士認得我,叫我唱自己歌,氹太太開心,話順便氹埋佢哋開心喎,不過最後我都冇認真唱,只係不停分散佢注意力。太太一路狂叫,佢本身其實講嘢好細聲,我諗生兩個仔係佢人生嗌得最大聲的兩次,嗌到拆天。」

Tommy說細佬和哥哥很似樣,都是跟爸爸餅印樣:「似我有似我好,似媽咪仲好,希望佢慢慢搵到人生方向,就係個樣似媽媽多啲好啲,唔使特別似爸爸,希望佢兩兄弟一團和氣。」他說護士也有問他會否追女,不過他說太太都決定收工了,實行兩個夠晒數。Tommy還代細路送禮物給哥哥,希望哥哥接受細佬進入家庭。