紀嘉良拍攝海報　祖兒備戰入行廿周年個唱

天后容祖兒（Joey）為慶祝入行20周年，將於8月假紅館舉行《萬通保險PRETTY CRAZY 容祖兒演唱會》，早前她更特意飛去東京影演唱會宣傳海報，貼切演唱會「Crazy」主題，用了24小時超額完成拍攝。

黃偉文助改名

Joey透露今次演唱會名字「PRETTY CRAZY」是由好友黃偉文（Wyman）為她度身而設︰「個名真係起得好好，因為呢20年嚟無論喺工作上、不同經歷上，一路走嚟都真係PRETTY CRAZY！『PRETTY CRAZY』呢兩個字，既可以代表到我哋對工作上面嘅CRAZY，又可以代表到我哋一直努力追求嘅優雅，簡簡單單兩個字形容咗我呢20年，Wyman真係勁﹗」

講到今次演唱會海報，Joey再與初入行20歲第一次開紅館演唱會合作過的國際知名攝影師Leslie kee 紀嘉良合作，她興奮謂：「呢個合作又係有齊PRETTY CRAZY元素！其實係去年東京睇明哥（黃耀明）演唱會嗰陣，突然諗起Leslie，就即刻約咗佢出嚟半個鐘，一個下午茶咁就已經定咗喺今年一月份影呢輯相，因為大家工作時間關係，我只係用咗一日飛去東京，24小時crazy咁完成呢次海報，影咗好似有超過12個鐘咁耐，一落機就去影相，影完就上機走，所有衫、形像設計，都係Leslie一手包辦，佢細致到每套衫都要我換埋指甲襯色，真係未試過咁影法，但係完成作品，當然係very pretty啦！影咗好多套衫，多到返嚟香港，淨係揀相都揀咗好耐，張張都咁好，唔知點揀。最後經過公司所有同事投票，最終好開心揀咗我最鍾意嗰一張用，之後大家仲可能睇到好多唔同款嘅海報。」

保持體力唔要瘦

作為20周年紀念演唱會，Joey憶述第一次開紅館騷的感覺︰「當時唔相信會有人來睇自己，20年後嘅今次，係我第10個紅館演唱會，crazy就交畀歌迷同觀眾，我就負責pretty啦！話就話8月先係演唱會，但係我已經開始準備，keep好自己身體，準備以最佳狀態，唱最好嘅歌、跳最正嘅舞畀大家睇，我希望今次唔好咁瘦，因為累積多年經驗，我發覺做演唱會最緊要係體力同健康，太瘦就冇營養又唔夠抵抗力去戰鬥，所以keep fit同調理身體係會同步進行，唔會畀自己病！」續大賣關子話會帶來一個前所未有的紅館騷給觀眾，讓大家見證她20年來的進步。

另外，Joey今次亦特別邀請了五代十國設計了一個代表這20年的logo，logo裏面以JY20字樣，砌成Joey最愛的鬱金香，而演唱會其他一系列的紀念品，都會有這個logo圖案。