分享成功秘訣　霆鋒話最緊要識捉…

藝人謝霆鋒應網站邀請出席分享會，集演員、歌手、企業家和廚師身份於一身的霆鋒，分享他的演藝及創業之路，過往曾在該網站做過分享會的包括美國神枱級天后Lady Gaga和NBA華裔球星林書豪等，而霆鋒則是首位的香港藝人。

霆鋒全程以流利英文對答，談及他擁有多重身份，如何可以專注做地做每一件事？他說：「我喺廚房學到嘅一樣嘢，就係time management！」他以烹飪作比喻：「當你要為2個人或4個人去煮兩道菜，係好容易，8個人，都可以，但要為10個人煮8道菜，而上菜嘅時候仲要熱嘅，特別係中國菜，就唔係咁容易。我係一個好八卦嘅人，我對好多嘢都好好奇，我會成日問點解？點樣？當我一開始專注一樣嘢嘅時候，我會鍥而不捨去鑽研，唔會被難題令我卻步，呢個係我嘅性格。」

正在籌備演唱會

主持人提到他上一隻廣東碟於2005年推出、出國語碟亦是10年前的事時，霆鋒搞笑地做出一個驚訝表情並反問：「真係㗎？」全場即刻大笑。問到音樂上的計劃時，他說：「真係冇特別去計劃，係順其自然，做唔同範疇嘅嘢有唔同好處，譬如有時股票會好過做房地產，有時做音樂會好過做電影。永遠唔會做一樣嘢係最好，如果個潮流好似浪，你捉到就會喺最高嘅位置。2014年我做第一季《鋒味》，成為內地最大型嘅飲食節目，依家我哋做到第五季。因為捉到呢個浪，依家節目行得好穩定，我就有多啲嘅時間去做音樂。」

三個Keywords形容自己

其後霆鋒透露正籌備演唱會，但未必會出碟：「依家個個都係做演唱會㗎啦！我哋係需要大啲嘅場地，不過仲未搵到地方。」最後，問他用甚麼Keywords去形容自己的性格和成功的人生，他說：「Creativity（創意）、Synergy（協同力）、Resourcefulness（足智多謀），唔同嘅Keywords可以用喺唔同嘅階段，不過如果我係貪心啲，我覺得每一個字都係我嘅Keyword。」