拍劇艷福無邊！余德丞現實中理想情人係…
20190329
東網電視
更多新聞短片
到底余德丞心水係邊個呢？
熱播劇集《福爾摩師奶》今晚大結局，即將揭曉誰是「開膛手」，藝人余德丞在當中飾演人力車伕「游池」，雖然今次只是他第二次拍劇，但演出已獲不少觀眾讚好，他表示家人和粉絲都讚他表現比第一次拍劇進步：「可能角色同自己相似，都係陽光正面同搞笑可愛，所以都易掌握。」
每次都拍住兩個靚女
講到劇中與江嘉敏和陳瀅有感情線，其中與陳瀅更錫了兩次，他笑言都算艷福無邊：「好開心，《誇世代》我就係同麥明詩同陳嘉寶有感情線，今次就係佢哋兩個，啲監製同編審似乎都對我好好，每次都畀兩個靚女我。」提到如果讓他選擇，劇中兩位女拍檔，再加上其「頭號緋聞女友」蔡思貝，哪位最符合他心中的女朋友標準？他笑言：「好難解決喎呢個問題，三個都要晒啦，因為我同佢哋都係好朋友，所以好難公正咁揀，同我做得朋友，大家性格都接近，都係直率同真。」
蔡思貝符合擇偶條件
講到他與思貝的關係撲朔迷離和曖昧，他坦言：「我哋拍旅遊節目先認識，拍攝過程大家從而了解，原來大家諗法都一致，呢行好難搵到交心朋友，都好難得思貝同陳瀅係我喺呢行可以深入少少傾到偈嘅朋友，都好珍惜呢段友誼。」講到他與思貝經常互讚對方，又見過家長，可會有進一步發展？他笑言：「我真係冇諗，正正常常依家咪幾好。（依家係咩關係？）好好朋友，出生入死嘅好兄弟，好似共過患難嘅感覺，大家好信任大家。（但佢係咪你鍾意嘅類型？）都算係，我鍾意運動型、陽光型，而且大家要互相了解同明白。」
三十而立家人冇催婚
講到他今年將30歲，男人三十而立，家人可有催他快些拍拖甚或成家立室？他表示：「冇喎，依家30歲都仲係好後生，都未去到談婚論嫁嘅階段，事業未發展得好好，經濟又未穩定，未諗到咁遠，諗吓工作點做到最好，令更多人認識我先。」
場地：Mad for Garlic（Causeway Bay）
髮型：Adrian Au @ Hip Hair Culture
----------------------------
東網巨星開咗ig喇，大家快啲follow啦！