終於同陳瀅谷劇！陳家樂預告會再續前緣？

藝人陳家樂現身電視劇《廉政行動2019》首映禮，他指之前未有機會同緋聞女友陳瀅一齊宣傳，今日終於可以同場，問到是否刻意避開對方？他否認說：「唔係，之前佢飛咗去緬甸，依家又到我飛。我今晚就要起程去墨西哥，拍林超賢導演嘅戲，本來我今日都嚟唔到首映，但導演畀我放多日假，呢套劇係林導做監製，佢都應該嚟，但嚟唔到，由我做埋代表。」

講到與陳瀅的緋聞傳得鬧哄哄，他表示大家是拍檔，兩人在劇中亦沒有感情線：「第一至五集都冇感情事線，導演想我哋畀人個感覺係第六集會有，不過呢套劇得五集，而且兩年先拍一次，如果之後再拍，應該講我哋已經好高級，因為套劇係講我哋由學堂出嚟嘅十年經歷。」

至於動作場面方面，家樂坦言不算多，因為想貼近真實生活：「啲人以為ICAC好似重案組同警察咁要揸槍，但其實佢哋係冇槍，要申請先有，而且多數係同警察合作，我問過ICAC嘅人，原來咁多年嚟ICAC係從未開過一槍，之前嘅電影都係假，係戲劇效果，我去咗佢哋嘅訓練中心參觀過，之前以為個個都好似古天樂同劉青雲咁型，原來同正常人差唔多，佢哋好斯文。（今次係拍林超賢導演嘅戲以來最舒服？）舒服，但有難度，唔係體力上，而係角色設計橫跨十年，有個變化。」