由影帝劉青雲、姜皓文、黃德斌及吳卓羲等主演的電影《拆彈專家2》，凌晨時段於廟街封街拍攝一幕大場面，引來過百途人圍觀勁墟冚！

套戲講得拆彈就實有爆炸場面，呢場戲就係講警方接報喺鬧市中一架汽車有炸彈，重案組同拆彈組到場調查，姜皓文行埋去架車附近時就發生爆炸，佢成個人畀爆炸氣流彈落地，場面非常震撼！

現場好多圍觀途人希望一睹劉青雲嘅風采，不過今晚佢戲唔多，只係坐喺拆彈車入面等候，而唔使拍攝時，佢就返入搭建嘅帳篷休息。黃德斌同吳卓羲就喺一店舖內等候埋位。據知，今次製作為求有最好效果，現場所見嘅消防員及救護員等，都係真嘅絕對唔係搵臨時演員扮！