「姨太」撐場！張衞健為女人棄做神父

「大帥哥」張衞健（Dicky）今日現身跑馬地聖瑪加利大堂，以「信仰之旅」為題舉行分享會，獲好友吳啟明、王君馨、「姨太」蔡思貝及前女子組合As One成員吳思佳到場支持，台下亦有約800名觀眾。Dicky以灰配粉紅色造型登場，全場即報以熱烈的歡呼聲兼拍手歡迎，相當墟冚。

Dicky由小時候開始講起，自爆第一志願是做神父，惟自言由開始發育、發情，就發現對女孩子好有興趣：「有研究生程度，研究女學生，但神父係唔可以結婚、生仔、拍拖，所以Excuse me，唔做神父喇！」認真爆笑！

拜神儀式拒上香

Dicky再講到參加新秀歌唱比賽時與天主的關係若即若離，更試過「臨急抱天主腳」祈禱：「想進級入15名參加TVB直播，唱林子祥首《抉擇》，準備好晒戰衣，萬市俱備只欠東風，突然記得要去祈禱，但太耐冇祈，唔記得教堂會關門，就喺門口求天主，最後冇獎拎。」

經過失敗後，Dicky決定誠心對天主，最終如願以償獲台風獎兼冠軍寶座。他笑話自此無論有事、冇事都會祈禱，例如拍古裝戲吊威也、做危險動作等，又指曾於某次開戲進行拜神儀式時，鼓起勇氣表明天主教徒身分，以祈禱代替上香：「要承擔風險㗎，拍得唔順利導演就會問邊個冇拜神。」