自揭入院原因！羅家英做前列腺穿刺手術出事

72歲藝人羅家英入院養病嘅消息，經契女楊玉梅探病而曝光，原來佢唔係發燒咁簡單，佢接受東網訪問，透露本來喺4月中要接受前列腺細胞檢查，所以要做一個穿刺手術，但就出現後遺症令佢細菌感染，但佢唔知道咁嚴重，喺冇休息情況下，繼續去橫店為網絡電影《心願清單》開工，連日拍攝，佢最後都撐唔住，初時感到不停發冷，跟住被送入當地醫院吊鹽水，但佢超好嘅演員道德，誓要完成拍攝先返港醫治，所以抱病開工，至日前先返港入醫院，最後驗出佢膀胱同腎都有發炎，目前正留院治療。

佢形容呢次可大可小，仲畀老婆汪明荃詐型，佢話：「我今日精神好啲，之前迷迷糊糊。（病住都開工？）今次我做男一，加上大堆人等住我開工，唔想阻礙拍攝，冇辦法啦，真係唔舒服嘅，咪日頭開工，夜晚入返醫院囉！（老婆擔心死？）係咁哦我囉，但都冇用㗎，後來咪冇出聲！（做前列腺檢查係有事嗎？）係男人都有嘅問題，原本冇大問題，之前我檢驗後話要攞細胞檢查，但要做穿刺（手術）先攞到，但有後遺症，都要做啦，點知就細菌感染，加埋我開工又冇乜休息，當時喺橫店拍嘢時，發冷呀，41度，後來醫生知我做咗個穿刺手術，所以要同我全身檢查，一星期都住院，期間就吊鹽水，成分有藥嘅，後來好啲出院，先為個戲埋尾，拍完就返香港，依家入咗醫治療，食抗生素囉，冇乜嘢了，大家可放心，過幾日都出院！」